தமிழகத்தில், சித்த, ஆயுர்வேதம் உள்ளிட்ட, இந்திய மருத்துவப் படிப்புகளுக்கான விண்ணப்ப வினியோகம் நாளை(ஜுலை 30) முடிகிறது.

தமிழகத்தில், சித்த, ஆயுர்வேதம் உள்ளிட்ட, இந்திய மருத்துவப் படிப்புகளுக்கான விண்ணப்ப வினியோகம் நாளை(ஜுலை 30) முடிகிறது.இதுவரை, 3,525 பேர் விண்ணப்பங்களை பெற்றுள்ளனர். தமிழகத்தில், சென்னை, மதுரை, பாளையங்கோட்டை மற்றும் நாகர்கோவிலில் சித்த, ஆயுர்வேதம் உள்ளிட்ட, இந்திய மருத்துவம் சார்ந்த ஆறு அரசு மருத்துவக் கல்லூரிகள் உள்ளன.சித்தா பி.எஸ்.எம்.எஸ்., ஆயுர்வேதம் பி.ஏ.எம்.எஸ்., யுனானி பி.யு.எம்.எஸ்., நேச்சுரோபதி மற்றும் யோகா பி.என்.ஓய்.எஸ்., மற்றும் ஓமியோபதி பி.எச்.எம்.எஸ்., படிப்புகளுக்கு 296 இடங்கள் உள்ளன. இதுதவிர, சுயநிதி கல்லூரிகளில் இருந்து, மாநில ஒதுக்கீட்டுக்கு 900 இடங்கள் வரை கிடைக்கும். இந்த படிப்புகளில் சேர்வதற்கான விண்ணப்ப வினியோகம் 14ம் தேதி துவங்கியது.இரண்டு வாரங்கள் ஆன நிலையில், இதுவரை 3,525 பேர், விண்ணப்பங்களை பெற்றுள்ளனர். இதில், 2,510 விண்ணப்பங்கள் வந்துள்ளன.இதுகுறித்து, இந்திய மருத்துவம் மற்றும் ஓமியோபதி இயக்க அதிகாரி ஒருவர் கூறுகையில், "விண்ணப்பங்கள் பெற, 30ம் தேதி கடைசி நாள். பூர்த்தி செய்த விண்ணப்பங்கள், 31ம் தேதிக்குள் வர வேண்டும். முன்கூட்டியே விண்ணப்பித்து இருந்தாலும், தாமதமாக வரும் விண்ணப்பங்கள் ஏற்கப்படாது. மேலும் விவரங்களை, www.tnhealth.org என்ற இணையதளத்தில் தெரிந்து கொள்ளலாம்" என்றார்.

வெளிமாநிலங்களில், ஆசிரியர் பயிற்சிப் படிப்பை முடித்த மாணவர்கள், தங்கள் சான்றிதழ்களை மதிப்பீடு செய்ய, ஆறுவகை சான்றிதழ்களை அனுப்ப வேண்டும்

வெளிமாநிலங்களில், ஆசிரியர் பயிற்சிப் படிப்பை முடித்த மாணவர்கள், தங்கள் சான்றிதழ்களை மதிப்பீடு செய்ய, ஆறுவகை சான்றிதழ்களை அனுப்ப வேண்டும் என, ஆசிரியர் கல்வி ஆராய்ச்சி பயிற்சி நிறுவனம் தெரிவித்துள்ளது.மதிப்பீடு: ஆந்திரா, கேரளா மற்றும் கர்நாடகா மாநிலங்களில், ஆசிரியர் பயிற்சிப் படிப்பை படித்த தமிழக மாணவர்கள், அம்மாநிலங்கள் வழங்கிய சான்றிதழை, தமிழக ஆசிரியர் கல்வி ஆராய்ச்சி, பயிற்சி நிறுவனத்திடம் சமர்ப்பித்து, மதிப்பீடு செய்ய வேண்டும்.இதன்பிறகே, தமிழக வேலைவாய்ப்பு அலுவலகங்களில் பதிவு செய்யவும், டி.இ.டி., (ஆசிரியர் தகுதித்தேர்வு) தேர்வை எழுதவும் முடியும். இந்த வகையில், 2,000 பேர், தமிழக கல்வித் துறையிடம், மதிப்பீடு செய்ய காத்திருக்கின்றனர். இந்நிலையில், வெளிமாநில சான்றிதழ்களை மதிப்பீடு செய்ய, எப்படி விண்ணப்பிக்க வேண்டும் என்பதை ஆசிரியர் கல்வி ஆராய்ச்சி பயிற்சி நிறுவனம் அறிவித்துள்ளது.பத்தாம் வகுப்பு மதிப்பெண் சான்றிதழ், பிளஸ் 2 மதிப்பெண் சான்றிதழ், வெளி மாநிலங்கள் வழங்கிய, ஆசிரியர் பயிற்சி முதலாம் ஆண்டு மற்றும் இரண்டாம் ஆண்டு மதிப்பெண் சான்றிதழ், ஆசிரியர் பயிற்சி பெற்றதற்கான சான்றிதழ், மாற்றுச் சான்றிதழ்(டி.சி.,), கோர்ஸ் சர்ட்டிபிகேட் ஆகியவற்றின் நகல்களை, விண்ணப்பித்துடன் இணைக்க வேண்டும்.மேலும், 500 ரூபாய் டிடி மற்றும் வெளிமாநில ஆசிரியர் கல்வித் துறை செயலர் பெயரில், 300 ரூபாய்க்கு, டிடி ஆகியவற்றுடன், இயக்குனர், ஆசிரியர் கல்வி ஆராய்ச்சி, பயிற்சி நிறுவனம், டி.பி.ஐ., வளாகம், கல்லூரி சாலை, சென்னை - 6 என்ற முகவரிக்கு விண்ணப்பிக்க வேண்டும்.

ஆகஸ்ட், 1ம் தேதிக்குள், 10 ஆயிரம் ஆசிரியர் தேர்வுப் பட்டியல் வெளியிடப்படும் என, டி.ஆர்.பி., (ஆசிரியர் தேர்வு வாரியம்) வட்டாரம் தெரிவித்தது

ஆகஸ்ட், 1ம் தேதிக்குள், 10 ஆயிரம் ஆசிரியர் தேர்வுப் பட்டியல் வெளியிடப்படும் என, டி.ஆர்.பி., (ஆசிரியர் தேர்வு வாரியம்) வட்டாரம் தெரிவித்தது.வரும், 30ம் தேதி, டி.இ.டி., தேர்வில் தேர்வு பெற்றவர்களின் இறுதி பட்டியல் வெளியிடப்படும் என, ஏற்கனவே டி.ஆர்.பி., அறிவித்து இருந்தது. இதற்கு, ஒரு சில தினங்களே அவகாசம் இருப்பதால், தேர்வு பட்டியலை எதிர்பார்த்து, தேர்வர்கள் ஆவலுடன் உள்ளனர்.இதுகுறித்து டி.ஆர்.பி., வட்டாரம் கூறியதாவது: தேர்வு பட்டியலை, இணையதளத்தில் வெளியிடுவதற்கான பணிகள், மும்முரமாக நடந்து வருகின்றன. திட்டமிட்டபடி பணி முடிந்தால், வரும் 30ம் தேதி 10,700 ஆசிரியர்களின் தேர்வு பட்டியல் வெளியாகும்.பணி முடிய சற்று கால தாமதம் ஏற்பட்டால், ஒரு நாள் தள்ளிப் போகலாம். எப்படியும் ஆகஸ்ட் 1ம் தேதிக்குள், இறுதி பட்டியல் வெளியிடப்படும். இவ்வாறு, டி.ஆர்.பி., வட்டாரம் தெரிவித்தது.பல்வேறு சிக்கல்கள் - விடிவு கிடைக்குமா?தகுதித் தேர்வின் அடிப்படையிலேயே இனிமேல் ஆசிரியர் நியமனம் நடைபெறும் என்று தமிழகத்தில் 2011ம் ஆண்டில் பொறுப்பேற்ற புதிய அரசு அறிவிப்பு வெளியிட்டதிலிருந்தே பல்வேறு குளறுபடிகளும், சிக்கல்களும் ஏற்பட்டன. 2012ம் ஆண்டுகளில் நடைபெற்ற 2 தகுதித் தேர்வுகளில் பெரிதாக சிக்கல் எழவில்லை. தேர்ச்சி பெற்றவர்கள், உடனடியாக பணி நியமனம் செய்யப்பட்டனர்.ஆனால், 2013ம் ஆண்டில் நடத்தப்பட்ட தேர்வுக்குப் பிறகுதான் சிக்கல்கள் ஏற்பட்டன. பல்வேறு மாநிலங்களிலும், தேர்வு மதிப்பெண்களில் இடஒதுக்கீட்டு பிரிவினருக்கு சலுகைகள் வழங்கப்படும் நிலையில், இடஒதுக்கீட்டின் தாயகமாய் திகழ்ந்து, இந்தியாவிலேயே அதிகளவான 69% இடஒதுக்கீடு வழங்கிவரும் தமிழகத்தில், மதிப்பெண் சலுகை இல்லையா? என்ற குமுறல்கள் எழுந்தன. குறைந்தபட்சம் மனிதாபிமான அடிப்படையில், பார்வையற்றவர்களுக்குக் கூட மதிப்பெண் சலுகை வழங்கப்படவில்லை. எனவே, மாற்றுத்திறனாளிகள் கடுமையான போராட்டங்களை தெருவில் இறங்கி நடத்தினார்கள்.மேலும், மதிப்பெண் சலுகை உள்ளிட்ட பல்வேறு பிரச்சினைகளை முன்னிறுத்தி, பலர், நீதிமன்றங்களில் வழக்குத் தொடந்தனர். மதிப்பெண் சலுகைப் பிரச்சினை தாழ்த்தப்பட்டோர் நல ஆணையத்திற்கு சென்றது.அப்போதுதான், அந்த எச்சரிக்கை வந்தது. தமிழகத்தின் சமூகநீதி போராட்டம் பற்றிய அறிவே இல்லாமல் செயல்படும் அதிகாரிகளுக்கு கடும் எச்சரிக்கையை அந்த ஆணையம் விடுத்தது. "மதிப்பெண் சலுகை வழங்கப்படவில்லை என்றால், சம்பந்தப்பட்ட அதிகாரிகள் மீது வன்கொடுமை சட்டப்படி நடவடிக்கை எடுக்கப்படும்" என்று ஆணையம் எச்சரித்தது. அதன்பிறகுதான் அரசு இறங்கி வந்தது.இடஒதுக்கீட்டு பிரிவினருக்கு 5% மதிப்பெண் சலுகை அறிவிப்பு வெளியானது. அதன்பிறகும் பிரச்சினை ஓயவில்லை. தவறான வெயிட்டேஜ் முறையின் மூலம், மதிப்பெண் கணக்கிடப்பட்டது. இதை எதிர்த்தும் பலர் நீதிமன்ற படிக்கட்டுகளை ஏறினார்கள். எனவே, உயர்நீதிமன்றம், அறிவுக்குப் பொருந்தும் வகையில் வெயிட்டேஜ் முறையை பின்பற்றும்படி, அரசுக்கு அறிவுரை வழங்கியது. இதனையடுத்து, புதிய வெயிட்டேஜ் முறை கொண்டுவரப்பட்டது.ஆனாலும், குமுறல்கள் அடங்கவில்லை. இன்று வாங்கும் 12ம் வகுப்பு மதிப்பெண்களுக்கும், 10 ஆண்டுகளுக்கு முன்னர் பெற்ற 12ம் வகுப்பு மதிப்பெண்களுக்கும் வித்தியாசங்கள் உள்ளன. எனவே, வெறுமனே மதிப்பெண்களை மட்டும் பார்க்காமல், வேலைவாய்ப்பு பதிவு மூப்பையும் கணக்கில் எடுக்க வேண்டும் என்ற கோரிக்கையும் எழுந்து, அதுதொடர்பாக நீதிமன்றத்தில் ஒரு வழக்கும் தொடுக்கப்பட்டது.ஆசிரியர் நியமனம் தொடர்பான அரசின் நடைமுறைகளால், தேவைக்கு அதிகமான தகுதிகளைக் கொண்டிருந்தும், பல ஆசிரிய பட்டதாரிகள், சரியான காலத்தில் பணி கிடைக்காமல் நொந்து நூலாகியுள்ளனர். புதிதாக படிப்பை முடித்து, பெரிதாக எந்த அனுபவம் மற்றும் அறிமுகமும் இல்லாமல், பலர் பணி வாய்ப்புகளைப் பெறுகின்றனர். இதனால் கல்வித்தரம் பாதிக்கப்படாதா? என்ற கேள்வியும் எழுகிறது.